Berriak • 15/04/2026

Bilboko Elizbarrutiko Karitate eta Justizia Ordezkaritzak eta Caritas Bizkaiak aparteko erregularizazioa justizia sozialaren eta gizarte‑kohesioaren aldeko neurri gisa baloratzen dute

  • Neurria funtsezkoa da pertsona migratzaileen eskubideetarako sarbidea bermatzeko eta haien gizarteratze osoa sustatzeko.
  • Administrazioari eskatzen diote espedienteak aurrez aurre erregistratzeko aukerak eskain ditzala balizko onuradun izan daitezkeen atzerritar guztientzat, prozesu irisgarri eta arina bermatzeko.

Bilboko Elizbarrutiko Karitate eta Justizia Ordezkaritzak eta Caritas Bizkaiak modu positiboan baloratu dute pertsona migratzaileen aparteko erregularizazioa ahalbidetuko duen Errege Dekretuaren onespena, ardura politiko, etiko eta sozialeko neurritzat hartuta.

Gizarte justuago eta inklusiboago baterantz aurrera egiteko urrats erabakigarria da, non pertsona guztiek beren eskubideak baliatu eta gizarte‑, ekonomia‑ eta komunitate‑bizitzan erabat parte hartu ahal izango duten. Erregularizazioak aukera erreal bat eskaintzen du bazterketa egiturazko egoerak hausteko eta kohesio handiagoko bizikidetza eraikitzeko.

Ikuspegi tekniko eta administratibotik prozesua konplexua dela kontuan hartuta, bi erakundeek azpimarratzen dute Administrazioak beharrezko baliabideak bermatu behar dituela, neurri hau benetan balizko onuradun izan daitezkeen pertsona guztiengana irits dadin, bereziki urteak daramatzatenentzat, bide arrunten bidez beren egoera erregularizatu ezinik.

“Ildo horretan, Caritasetik Administrazio Publikoei (AAPP) eskatzen diegu aurrez aurreko erregistroa erraztea, beharrezko dokumentazioa eskuratzea eta espediente horien lehentasunezko izapidetzea bermatzea. Bestela, aparteko erregularizazio honen onespenak ez luke bere helburua beteko” Susana Cuesta, Caritas Bizkaiako zerbitzu juridikoko arduradunak adierazitakoa

Ebanjelioaren adierazpen koherentea

Pertsona migratzaileak hartzea, babestea eta duintzea Elizarentzat bere misioari berez lotutako betekizuna da. Manu Moreno, Karitatea eta Justizia eta Caritas Bizkaiako arduradun episkopalak honela adierazi du: «Justizia sozialeko neurria da hau, pertsonen eskubideen aitortzarako urratsa; eskubideetatik abiatuta eraiki nahi den gizarte bat erakusten du, eta ez urraketatik edo bazterketatik. Neurri honek aukera ematen du etorkizun baten bila beren lurra uztera behartuta dauden pertsona asko ikusarazi eta duintzeko».

2023tik hona, Caritas Bizkaia beste eliza‑ eta gizarte‑erakunde batzuekin batera behin eta berriz ari da azpimarratzen pertsona migratzaileen aldeko aparteko erregularizazio‑prozesu bat onartzearen beharra, justizia‑ eta gizarte‑kohesio‑auzi gisa eta giza eskubideekiko (GGEE) errespetuaren adierazpen gisa. 600.000 sinadura baino gehiago bildu zituen Herri‑Ekimen Legegileak norabide horretan egindako mobilizazio sozialaren adibide argia izan zen.

Eragina Euskadin

Administrazio‑irregularitateak Euskadin bizi diren pertsonak ahultasun egoera larrian jartzen ditu, oinarrizko eskubideetarako sarbidea nabarmen mugatzen duelako eta diskriminazio mota askoren eraginpean jartzen dituelako.

FOESSAk Euskadiko gizarte‑bazterketari eta garapen sozialari buruz egin duen IX. Txostenaren arabera, 315.000 pertsona migratzaile baino gehiago bizi dira autonomia‑erkidegoan. Horietako askok pairatzen duten egoera administratibo irregularrak eragiten du %41 gizarte‑bazterketa egoeran egotea, bertako biztanleen portzentajea baino bost aldiz handiagoa den kopurua.

Testuinguru honetan, Caritas Bizkaiak 2025ean egoera irregularrean zeuden 4.700 pertsona migratzaile baino gehiago artatu zituen, bide-lagundutza jaso zuten pertsona guztien %41 izanik. Errealitate hori etengabe handitzen ari da 2019tik hona. Azken batean, irregularitateak ez du soilik autonomia pertsonala mugatzen; ikusezintasunaren eta babesik ezaren zirkulu bat sortzen du, gizarte‑bizikidetzaren multzoari eragiten diona

Ziurgabetasunetik eta zaurgarritasunetik ateratzea

Administrazio-erregularizazioak sakonki eraldatzen du migratzaileen bizitza, ziurgabetasunetik irtetea eta oinarrizko eskubideak eskuratzea ahalbidetzen baitie. Elena Unzuetak, Caritas Bizkaiaren zuzendariak, dioenez: “Neurri honek ez ikusiarena egiten jarraitu ezin zuen errealitate bati erantzuten dio, eta aukera bat da kohesio sozialean aurrera egiteko, eskubideak bermatuz eta gizarte justuago bat indartuz. Bizileku- eta lan-baimena izateak enplegu formalari eta segurtasun ekonomiko handiagoari ateak irekitzeaz gain, funtsezko zerbait errazten du, hala nola osasunera, etxebizitzara, hezkuntzara edo oinarrizko zerbitzuetara normaltasunez iristea, eta eguneroko kudeaketak beldurrik gabe egin ahal izatea “. Eta gehitzen du: “Gainera, erregularizazioak esplotazioaren eta diskriminazioaren aurrean babesten du, eta bizikidetza bidezkoagoa eta inklusiboagoa bultzatzen du. Azken batean, milaka pertsona ikusezintasunetik erabateko parte-hartze sozialera igarotzeko aukera bat da, beren lanarekin eta zergekin zerbitzu publikoei eusten eta gure gizartea indartzen ere lagunduz“.