Ariz Zentroko Industria Arloko Prestakuntza Tailerren amaiera eta emaitzak

Industria Arloko Bigarren Prestakuntza Tailerra amaitu da, parte-hartzaile guztientzat oso balantze positiboarekin. Azken asteotan, parte-hartzaileek lan-merkatuaren erronkei aurre egiteko prestakuntza sakona jaso dute, eta funtsezko tresnak eskuratu dituzte hainbat arlotan, hala nola industria-instalazioen hastapenetan eta biltegiko laguntza-eragiketetan.

Egindako ahaleginak eta erakutsitako konstanteziak emaitza onak ekarri dituzte. Izan ere, aurreko Industria Arloko Prestakuntza Tailerreko datuak ere kontuan hartuta, prestakuntzetan parte hartu duten 22 pertsonetatik 15ek arrakastaz amaitu dute programa, eta horrek euren motibazioa eta gaitasun profesionalak indartu ditu.Gainera, enpresa-sarearen erantzuna berehala nabaritu da; izan ere, prestakuntzak egiten ari ziren bitartean, bi parte-hartzaile lan-merkatuan txertatzea lortu dute. Bestalde, tailerraren balorazio orokorrak 10etik 9,24 puntuko gogobetetze-maila lortu du, eta horrek argi erakusten du bi taldeek programari emandako balioa eta duten iritzi ona.

Laneratze-ibilbide hau erakunde eta administrazio ezberdinen konpromisoari eta lankidetzari esker gauzatu ahal izan da. Zehazki, Europako Funtsek kofinantzatutako Sendotu Aldi Berean programaren laguntza izan du, Eusko Jaurlaritzako Ekonomia, Lan eta Enplegu Sailaren eta Bizkaiko Foru Aldundiko Enplegu, Gizarte Kohesio eta Berdintasun Sailaren bidez.