Caritas Bizkaiak What the Fake Antirumores saria jaso du “Yo también cuento / Nire ahotsa ere baliotsua” erakusketagatik

Caritas Bizkaiak What the Fake Antirumores saria jaso du, Komunikazio Ekimena – Amplificador Antirumores kategorian, “Yo también cuento / Nire ahotsa ere baliotsua” argazki-erakusketagatik. Erakusketa hori Argi ibili, No te encalles zurrumurruen aurkako estrategiaren baitan garatu da, eta Bizkaiko Foru Aldundiaren finantzaketa jaso du.

Sariaren banaketa urriaren 29an Iruñean egin zen, I. Antizurrumurruen Bienalak antolatutako ekitaldian. Aitortza honek bultzada garrantzitsua ematen dio Caritas Bizkaiak Nazioarteko Lankidetza eta Migrazioak arlotik egiten duen lanari, herritar kritiko, konprometitu eta solidarioak sustatzeko, aurreiritziei, estereotipoei eta diskriminazio-diskurtsoei aurre egiteko gai direnak.

Sarien deialdiak lurralde osotik jasotako 35 proposamen bildu zituen, estatu mailako lau kategoriatan eta nazioarteko kategoria batean banatuta. Antolatzaileen arabera, aurkeztutako ekimen guztiak tresna baliotsuak dira gizarte bidezkoagoak, inklusiboagoak eta diskriminaziorik gabekoak eraikitzen jarraitzeko.

Caritas Bizkaiatik eskerrak eman nahi ditugu aitortza honengatik; izan ere, balioa ematen dio “Yo también cuento / Nire ahotsa ere baliotsua” erakusketaren bidez egindako lanari. Ekimen honen helburua jatorri askotako pertsonen ahotsak eta bizipenak ikusaraztea da, eta, aldi berean, giza eskubideen aldeko defentsan parte hartzeko gaitasuna duten subjektu politiko aktibo gisa aitortuak izan daitezen sustatzea.

Sari honek erakundea animatzen du sentsibilizazio-ekintzak sustatzen jarraitzera, pertsona guztiak berdintasunean aitortu eta entzunak izango diren gizarte inklusiboago bat eraikitzen laguntzeko.