Caritas Euskadik erronka sozialak eta politika publikoak aztertu ditu FOESSA Euskadi txostenetik abiatuta

FOESSA Euskadi txostenaren irakurketa estrategikoa egiteko eta gure ekintzari eragiten dioten erronka sozial nagusiei buruz hausnartzeko lan-jardunaldi tekniko batean parte hartu zuten euskal elizbarrutiko hiru Caritetako zuzendaritza-taldeek eta arduradunek, joan den otsailaren 3an, Gasteizen.

Saioa Jesús Gutiérrez Gasteizko Elizbarrutiko Caritaseko idazkari nagusiak aurkeztu zuen eta Joseba Zalakain SIIS Dokumentazio eta Ikerketa Zentroko zuzendariak parte hartu zuen. Honek Euskadiko gizarte testuingurua eta politika publikoak aztertu zituen txostenaren ondorioetan eta etxerik gabeko pertsonei buruzko azterlanean oinarrituta.

Gainera, taldeek María Silvestre Deustuko Gizarte Balioen zuzendari eta Deustuko Unibertsitateko irakaslearen hitzaldiaren grabazioaren inguruan lan egin zuten. Hitzaldi hori abenduaren 3an egin zen, FOESSA txostena Euskadin aurkezteko ekitaldian. Bertan, sakoneko hausnarketa egin zen egungo gizarte-ereduari eusten dioten balioei buruz.

Topaketak gizarte-diagnostiko partekatuan sakontzea, elizbarrutien arteko begiradak kontrastatzea eta bazterketa- eta kalteberatasun-egoerei modu eraginkorragoan erantzuteko jarduera-ildo komunak zehaztea ahalbidetu zuen.

Jardunaldiak analisi teknikoa, talde-lana eta bateratze-lana uztartu zituen, koordinazioa hobetzera eta gure erantzunak sendotzera bideratutako baterako plangintza-espazio bat sortuz.

Horrelako espazioak Caritas Euskadik eta Caritas Bizkaiak lurraldean estrategiak lerrokatzeko, ezagutza partekatzeko eta gizarte-ekintza indartzeko egiten duten etengabeko lanaren parte dira.