Berriak • 11/12/2025

Caritas Bizkaiak loturak berreraikitzeko eta bizitza komunitarioa sendotzeko deia egin du 2025eko Gabonetako kanpainan

  • Abendu aldi hasieratik Caritas Bizkaiak Gabonetako kanpaina abian jartzen du. Kanpaina urtarrilaren 5ean amaituko da, Bilboko Opil Solidarioaren XXII. edizioarekin. Aurten, berrikuntzak izango dira: animazioak eta dinamizazioa goiz osoan, Opil Solidarioaren I. Ipuin Lehiaketaren sari-banaketa eta enpresa laguntzaile berrien parte-hartzea.
  • 2025eko behin-behineko datuen arabera, Caritas Bizkaiak 11.000 pertsona inguru artatu ditu; horietatik 4.000 baino gehiago seme-alabak dituzten familietakoak dira, eta 18 urtetik beherako 1.600 baino gehiagori eman die bide-laguntza. Gainera, 2.300 pertsona inguruk espazio komunitarioetan parte hartu dute, harreman pertsonalak eta inguruko pertsonekiko lotura aberastuz.

Bilbo, 2025eko abenduaren 11a. Caritas Bizkaiak 2025eko Gabonetako kanpaina aurkeztu du gaur, ideia nagusi baten inguruan antolatua: komunitate-bizitza indartzeko beharra, nahi ez den bakardadearen hazkundearen eta seme-alabak dituzten milaka familiak bizi duten kalteberatasunaren aurrean. Joan den abenduaren 3an aurkeztu berri den FOESSA Euskadi txostenak erronka hori berresten du: adingabeak dituzten familiek bazterketaren % 65 biltzen dute, eta loturak haustea eta gizarte-isolamendua, berriz, errealitate gero eta handiagoa eta egiturazkoa bihurtu dira.

Izan ere, 2025ean Caritas Bizkaiak 11.000 pertsona inguru artatu ditu, eta horietatik 4.000 baino gehiago seme-alabak dituzten familietakoak dira, eta 18 urtetik beherako 1.600 laguni baino gehiagori eman die bide-laguntza. Gainera, 2.300 pertsona inguruk espazio komunitarioetan parte hartu dute, harreman pertsonalak eta inguruko pertsonekiko lotura aberastuz.

Elena Unzueta, Caritas Bizkaiako zuzendariak, azpimarratu duenez, “FOESSAren zifrek zuzenean interpelatzen gaituzte, bazterkeria ez delako baliabide materialekin bakarrik gainditzen; harremanak, elkarrekiko laguntza eta zerbaiten parte sentitzeko espazioak behar ditugu. Caritas Bizkaiak Eguberri hauek bizitzera gonbidatzen du, lotura horiek indartuz eta gehien behar dutenei lagunduz “.

 

Horregatik, abendu osoan, Abendu aldiarekin eta Gabonekin batera, Caritas Bizkaiak hainbat ekimen bultzatzen ditu, komunitate-loturak berreraikitzeko ekintza zehatzetan oinarritzen direnak:

  • BISUBI: duintasun partekatuko esperientzia. Abenduko lehen astean, BISUBI Fundazioarekin eta BBK Fundazioarekin lankidetzan, Caritas BIzkaiaren proiektuetan parte hartu zuten 100 pertsonak esperientzia gastronomikoez gozatu zuten Bizkaiko 25 jatetxetan. Proposamen horrek, gozamenerako une bat errazteaz gain, bizikidetzaren eta eguneroko bizitzaren normalizazioaren adibide gisa jarduten du, komunitate-klabean.
  • Opil Solidarioaren I. Ipuin Lehiaketa. EBI elizbarrutiko zentroekin eta Bizkaiko katekesi taldeekin aliantzan, Caritas Bizkaiak 6 eta 17 urte bitarteko umeei zuzendutako Opil Solidarioaren I. Ipuin Lehiaketa bultzatzen du. Lehiaketak harreman-ehuna berreraikitzeko deiarekin bat datozen pertsonei buruzko istorioak idaztera gonbidatzen du. Kontakizunak abenduaren 31ra arte aurkeztu ahal izango dira.
  • FOESSA Euskadi: premiazko deia da txostena aurkeztea. Abenduaren 3an, Caritas Bizkaiak FOESSA Euskadi txostena aurkeztu zuen. Txosten horrek egiaztatzen du prekarietatearen eta gizarte-bazterketaren iraunkortasunaren arabera bizi diren familien kopuruak gora egin duela. Txostenaren arabera, lan-prekarietatea, etxebizitza lortzeko zailtasunak eta gizarte-loturen ahultzea dira egoera horiek sortzen dituzten funtsezko elementuak. Aurpegien artean, haurrak eta gazteak nabarmentzen dira, haurren % 20 gizarte-bazterkeriako egoeran baitago. Seme-alabak zaintzapean dituzten familiak dira gehien kaltetutako beste taldeetako bat. Emakumeak buru dituzten familiek, gainera, indar handiagoz pairatzen dute bazterkeria hori (% 15, gizonak buru dituzten etxekoen unitateen % 10en aldean).
  • “Zurekin Batera BAI”: partekatzen den elkartasuna. Caritas Bizkaiak “Sin ti no soy nada, Zurekin batera, bai” kanpainari berrekin dio, ekarpen ekonomikoak egitera animatuz — ekarpenak egiten dituenak hurrengo ekitaldian zerga-arintzearen onura jasoko du, emandako zenbatekoaren % 45ekoa —. Aurpegi ezagunek eta pertsona anonimo askok bat egin dute familiei eta haurrei zuzendutako proiektuei eusteko laguntza ekonomikoak duen garrantzia ikusarazteko.
  • Abenduak 20 eta 21: “Navidad en Comunidad. Bizi batera”. Bizkaiko parrokia guztietan ospatuko da “Navidad en Comunidad. Bizi batera”, loturak berreraiki, bide-laguntza eman eta komunitatean aktiboki parte hartzeko beharraz sentsibilizatzeko
  • Bilboko Opil Solidarioaren XXII. edizioa

Gabonetako kanpaina urtarrilaren 5ean amaituko da Bilboko Plaza Barrian, Opil Solidarioaren XXII. edizioarekin, 10:00etatik 14:30era. 3.000 opil eta txokolate errazio banatuko dira 2 euroko dohaintza sinboliko baten truke. Diru hori haurtzaroko eta familia-laguntzako proiektuetarako erabiliko da oso-osorik, funtsezkoa baita pobreziaren belaunaldien arteko transmisioari aurre egiteko. Aurtengo ekitaldiak nobedadeak dakartza: animazioak eta dinamizazioa goiz osoan zehar, Opil Solidarioaren I. Ipuin Lehiaketaren sari banaketa eta enpresa kolaboratzaile berrien partaidetza.

Opila Euskofriz-Bidfoodek egingo du, Lapiko Catering-ekin koordinatuta eta GASCA Catering-en laguntzarekin. Kaikuk (esnea) eta Baquek (kakaoa) txokolatearen osagaiak ematen dituzte. Ekitaldiak Laboral Kutxaren eta Zurekin Busen babesa du, eta Zazpi Kaleak Alde Zaharreko Merkataritza, Ostalaritza eta Enpresen Elkartearen laguntza. Bertaratzerik ez dutenek Caritas Bizkaiaren Bizum 33514ren bitartez ere lagundu ahal izango dute.

prentsa-oharra